8 years ago
Sapa
Ang marahang daloy ng tubig sa sapa
Mga batong buhay ito'y sinasala;
Nakukulimliman ng dahong sagana
Upang ang pag agos hindi magambala....
Ang himig ng agos ay sinasabayan
Ng huni ng ibong nasa kakahuyan;
Malamig na simoy ng hanging amihan
Ang nagpapalamig sa tubig na Kristal.
Ang Kristal na tubig siyang bumubuhay
Sa lahat ng sibol sa mundong ibabaw
Upang magpatuloy takda ng Maykapal
Ginuhit ang sapa upang maging daan.
Kapag merong unos nagbabagong anyo
Ang mayuming sapa’y magaalimpuyo;
Tubig na maputik ang babaha dito
At kapahamakan ang dulot sa tao.
Bundok ay guguho aanod sa sapa
Isa na ngang ilog umapaw na baha,
At sa kapatagan hahasik ng luha
Kapag mga buhay ang syang sinalanta.
isinulat ni: Gng Marianita R. Ilao
Manlayo
Ang bayan ng Guinayangan may karatig baryo
Isang komunidad ang dito'y nabuo
Mga mangingisda silang napadako
Galing sa kanluran, nagkanlong na dito.
Isang komunidad ang dito'y nabuo
Mga mangingisda silang napadako
Galing sa kanluran, nagkanlong na dito.
Mula pang Cavite na malayong bayan
Tinurang Manlayo ang bagong tahanan
Nagpunla ng tyaga, dagat ay nilinang
Mga mangingisdang sipag ang puhunan.
Tinurang Manlayo ang bagong tahanan
Nagpunla ng tyaga, dagat ay nilinang
Mga mangingisdang sipag ang puhunan.
Tawag sa kanila'y mga Manlayuhin
Ngunit tunay silang mga Guinyanganin
Katangiang taglay mabibigyang pansin
Masinop, maliksi, buo ang damdamin.
Ngunit tunay silang mga Guinyanganin
Katangiang taglay mabibigyang pansin
Masinop, maliksi, buo ang damdamin.
Likas sa kanila ang maging masikap
Ang sariwang hangin dala ay pagunlad
May kapanatagang katulad ng dagat
Unos ma'y dumating, hindi natitinag.
Ang sariwang hangin dala ay pagunlad
May kapanatagang katulad ng dagat
Unos ma'y dumating, hindi natitinag.
Bagong Manlayuhing dito na isinilang
Kalaro ay bangka, laruan ay sagwan
Hardeng nilakiha'y pinong buhanginan
Magandang pangarap dito hinihimay.
Kalaro ay bangka, laruan ay sagwan
Hardeng nilakiha'y pinong buhanginan
Magandang pangarap dito hinihimay.
May kaugalian dati sa Manlayo
Bukas-palad sila sa lahat ng tao
Bahagi ng huli ay "mabobosing" mo
Kahit ano ka pa o kahit na sino.
Bukas-palad sila sa lahat ng tao
Bahagi ng huli ay "mabobosing" mo
Kahit ano ka pa o kahit na sino.
Sa umpisa'y sibid, naging palakaya
Galadgad, Tres Palo, may Troll pa ang iba
Sagana sa huli, dagat ay maganda
Walang nagugutom sa bawat pamilya.
Galadgad, Tres Palo, may Troll pa ang iba
Sagana sa huli, dagat ay maganda
Walang nagugutom sa bawat pamilya.
Ang Manlayo ngayon, ito ba'y ganun pa rin?
May laman-dagat pa? meron pang buhangin?
Ang nasasanghap ba'y sariwa pang hangin?
Pagibig sa dagat nasa puso pa rin?
May laman-dagat pa? meron pang buhangin?
Ang nasasanghap ba'y sariwa pang hangin?
Pagibig sa dagat nasa puso pa rin?
Sana nama'y walang gaanong nagbago
At kung may ilan ma'y mabigyang remedyo
Lumipad na sibol ay muling dadako
Lilingon sa dagat at yayakap dito.
isinulat ni: Gng Marianita R. Ilao
(tulang alay sa mga Manlayuhin)
